భవిష్యత్ క్రీడా దిక్సూచిగా విశాఖ అకాడమీ / Vizag Set to Become Global Sports Hub with PV Sindhu Academy

August 5, 2026, 6:41 PM IST CNR

పట్టు వదలకుండా ప్రయత్నిస్తే సాధించలేనిది ఏదీ లేదనే మాటకు క్రీడా రంగం నిలువెత్తు నిదర్శనం. నిరంతర సాధన, క్రమశిక్షణ, త్యాగం, ఆత్మవిశ్వాసం కలిస్తే ఒక సాధారణ క్రీడాకారుడు ప్రపంచ విజేతగా ఎదగగలడు. అలాంటి వేలాది మంది విజేతలను తీర్చిదిద్దే మహత్తర లక్ష్యంతో విశాఖపట్నం వేదికగా ఆంధ్రప్రదేశ్ క్రీడా చరిత్రలో సరికొత్త అధ్యాయం ప్రారంభమైంది. స్టార్ షట్లర్, ఒలింపిక్ పతక విజేత పీవీ సింధు పేరుతో నిర్మించనున్న సెంటర్ ఫర్ స్పోర్ట్స్ ఎక్సలెన్స్‌కు మంత్రి నారా లోకేష్ శంకుస్థాపన చేయడం కేవలం ఒక నిర్మాణ కార్యక్రమం కాదు. ఆకాశమే హద్దుగా ఎదగాలని కలలు కనే ఏపీ యువతకు ప్రభుత్వం అందిస్తున్న భరోసా. రాష్ట్రాన్ని విద్య, పరిశ్రమలు, సాంకేతిక రంగాల్లోనే కాకుండా క్రీడల్లోనూ దేశానికి దిక్సూచిగా నిలపాలన్న దీర్ఘకాలిక దార్శనికతకు ఇది ప్రతిరూపం.

ఒక్క సింధుతో ఆగని ప్రయాణం

పీవీ సింధు విజయాలను దేశం మొత్తం చూసింది. ఒలింపిక్ వేదికపై భారత పతాకం రెపరెపలాడినప్పుడు ప్రతి భారతీయుడు గర్వంతో ఉప్పొంగిపోయాడు. అయితే ఆ పతకాల వెనుక కనిపించని సంవత్సరాల శ్రమ, తెల్లవారకముందే ప్రారంభమైన సాధన, కుటుంబ సభ్యుల త్యాగం, కోచ్‌ల అంకితభావం ఉన్నాయి. చిన్న వయసులో భారత జెర్సీ ధరించాలని కలలు కన్న సింధు, హైదరాబాద్ నగరం మేల్కొనేలోపే కోర్టులో సాధన ప్రారంభించేవారని లోకేష్ గుర్తుచేశారు. అప్పట్లో కెమెరాలు లేవు, పతకాలు లేవు, పత్రికల్లో శీర్షికలు లేవు. ఉన్నదల్లా పట్టుదల, క్రమశిక్షణ, త్యాగం మాత్రమే. అవే ఆమెను ప్రపంచ చాంపియన్‌గా, ఒలింపిక్ పతక విజేతగా, భారతదేశపు గొప్ప క్రీడా ప్రతీకల్లో ఒకరిగా నిలబెట్టాయి.

ఇప్పుడు తన అనుభవాన్ని తనతోనే ముగించకుండా, భవిష్యత్ తరాలకు అందించాలని సింధు నిర్ణయించుకోవడం ఈ అకాడమీకి అసలైన ప్రాణం. ఒక సింధు సాధించిన విజయాన్ని చూసి గర్వపడటంతో ఆగకుండా, మరెందరో సింధులను తయారుచేసే వ్యవస్థను నిర్మించాలన్న సంకల్పమే ఈ ప్రాజెక్టుకు పునాది.

చంద్రబాబు విజన్‌తో విస్తరించిన లక్ష్యం

మొదట బ్యాడ్మింటన్ అకాడమీగా రూపుదిద్దుకున్న ఆలోచనను ముఖ్యమంత్రి నారా చంద్రబాబు నాయుడు మరింత విస్తృతమైన క్రీడా దృక్పథంగా మార్చారు. బ్యాడ్మింటన్‌కే ఎందుకు పరిమితం కావాలి, అన్ని క్రీడల్లో ప్రతిభ ఉన్న పిల్లలు వచ్చి శిక్షణ పొందే సెంటర్ ఆఫ్ ఎక్సలెన్స్‌గా తీర్చిదిద్దాలని ఆయన సూచించారు. ఆ ఆలోచన ఫలితంగానే ఇది కేవలం షటిల్ బ్యాడ్మింటన్ శిక్షణ కేంద్రంగా కాకుండా బ్యాడ్మింటన్, స్విమ్మింగ్, జిమ్నాస్టిక్స్, షూటింగ్, వెయిట్‌లిఫ్టింగ్, బాస్కెట్‌బాల్, ఫుట్‌బాల్ వంటి విభిన్న క్రీడలకు వేదికగా మారబోతోంది.

ఒక భవనం నిర్మించడం వేరు, ఒక క్రీడా వారసత్వాన్ని నిర్మించడం వేరు. విశాఖలో రూపుదిద్దుకోనున్న ఈ కేంద్రం రెండో లక్ష్యాన్నే ప్రతిబింబిస్తోంది. ప్రతిభతో లోపలికి అడుగుపెట్టే ప్రతి యువ క్రీడాకారుడు స్పష్టమైన లక్ష్యంతో బయటకు వచ్చేలా దీనిని తీర్చిదిద్దాలన్న ప్రభుత్వ సంకల్పం ఏపీ క్రీడా భవిష్యత్తుకు కొత్త దిశను చూపుతోంది.

విజేతలు పుట్టరు.. తయారవుతారు

ప్రపంచంలోని ప్రముఖ క్రీడా దేశాలు విజేతలు పుట్టేవరకు ఎదురుచూడవు. విజేతలు తయారయ్యే వాతావరణాన్ని ముందుగానే నిర్మిస్తాయి. ఆస్ట్రేలియన్ ఇన్‌స్టిట్యూట్ ఆఫ్ స్పోర్ట్, ఖతార్‌లోని ఆస్పైర్ జోన్ వంటి ప్రతిష్ఠాత్మక సంస్థలు ఆయా దేశాల క్రీడా విజయాలకు బలమైన పునాదులుగా నిలిచాయి. ఒలింపిక్ పతకాలను క్రీడాకారులు గెలుస్తారు. కానీ ఒలింపిక్ కలలను సంస్థలు నిర్మిస్తాయన్న లోకేష్ వ్యాఖ్య ఈ అకాడమీ లక్ష్యాన్ని స్పష్టంగా వివరిస్తోంది.

ఇప్పటివరకు భారత యువ క్రీడాకారులు అత్యుత్తమ శిక్షణ కోసం విదేశాల్లోని ప్రముఖ సంస్థలవైపు చూసేవారు. రాబోయే రోజుల్లో దేశంలోని ప్రతిభావంతులైన క్రీడాకారులు శిక్షణ కోసం విశాఖలోని పీవీ సింధు సెంటర్ ఫర్ స్పోర్ట్స్ ఎక్సలెన్స్‌ను ఎంచుకునే స్థాయికి దీనిని తీసుకెళ్లాలన్నది ప్రభుత్వ లక్ష్యం. ఏపీ కేవలం చాంపియన్లను తయారుచేసే రాష్ట్రంగానే కాకుండా, దేశవ్యాప్తంగా ప్రతిభావంతులైన క్రీడాకారులను ఆకర్షించే గమ్యస్థానంగా మారబోతోంది.

18 నెలల్లో కలను సాకారం చేసే దిశగా

ప్రాజెక్టును నిర్ణీత కాలవ్యవధిలో పూర్తి చేయాలన్న దృఢ సంకల్పాన్ని లోకేష్ తన ప్రసంగంలో స్పష్టంగా వెల్లడించారు. నిర్మాణ పనులను 18 నెలల్లో పూర్తి చేయాలని నిర్వాహకులకు లక్ష్యం నిర్దేశించారు. పనుల పురోగతిపై ఎప్పటికప్పుడు సమీక్షలు నిర్వహిస్తామని, ప్రభుత్వం నుంచి అవసరమైన సహకారం నిరంతరం అందుతుందని హామీ ఇచ్చారు. మే 2028 నాటికి ముఖ్యమంత్రి చంద్రబాబు నాయుడు చేతుల మీదుగా అకాడమీ ప్రారంభోత్సవం జరగాలనే లక్ష్యాన్ని కూడా ప్రకటించారు.

ప్రణాళికను ప్రకటించడమే కాకుండా, దానికి స్పష్టమైన కాలపరిమితిని నిర్ణయించడం ప్రభుత్వ కార్యాచరణ వేగాన్ని తెలియజేస్తోంది. విజన్, ప్రణాళిక, అమలు అనే మూడు అంశాలను సమన్వయం చేస్తూ ఏపీలో అభివృద్ధి ప్రాజెక్టులు ముందుకు సాగుతున్న విధానానికి ఈ అకాడమీ మరో ఉదాహరణగా నిలుస్తోంది.

ప్రతి చిన్నారిలో ఒక ప్రత్యేక ప్రతిభ

ప్రతి చిన్నారి డాక్టర్ లేదా ఇంజనీర్ కావాల్సిన అవసరం లేదు. ప్రతి ఒక్కరిలో ఏదో ఒక ప్రత్యేకమైన ప్రతిభ ఉంటుంది. ఆ ప్రతిభను గుర్తించే అవకాశం కల్పించడం మంచి ప్రభుత్వం, మంచి విద్యావ్యవస్థ బాధ్యత అని లోకేష్ స్పష్టం చేశారు. తరగతి గది విజ్ఞానాన్ని అందిస్తే, క్రీడా మైదానం వ్యక్తిత్వాన్ని నిర్మిస్తుంది. తరగతి గది ఎలా ఆలోచించాలో నేర్పిస్తే, ఆటల మైదానం ఎలా పోరాడాలో నేర్పిస్తుంది. గెలుపు ముందు క్రమశిక్షణ, విజయం ముందు ప్రత్యర్థిపై గౌరవం, గెలిచిన తర్వాత వినయం, ఓడిన తర్వాత మళ్లీ లేచే ధైర్యం క్రీడల ద్వారానే అలవడతాయి.

అందుకే ప్రతి చిన్నారి పతకం గెలవాలనే ఉద్దేశంతోనే క్రీడలు ఆడాల్సిన అవసరం లేదు. క్రీడల్లో పాల్గొనే ప్రతి చిన్నారి ఆత్మవిశ్వాసాన్ని మాత్రం తప్పకుండా గెలుచుకుంటాడు. ఈ భావనకు అనుగుణంగా ఏపీ పాఠశాలల్లో శనివారాన్ని నో బ్యాగ్ డేగా అమలు చేస్తూ, విద్యార్థులకు తమకు నచ్చిన క్రీడను ఎంచుకునే అవకాశం కల్పించడం ప్రభుత్వం క్రీడలకు ఇస్తున్న ప్రాధాన్యాన్ని తెలియజేస్తోంది. పిల్లలు తమ ఆసక్తిని గుర్తించి ముందుకు వెళ్లేందుకు అవసరమైన క్రీడా పరికరాలను కూడా సమకూరుస్తున్నట్లు లోకేష్ వెల్లడించారు.

బాలికల క్రీడా భవిష్యత్తుకు కొత్త భరోసా

క్రీడల్లో బాలికల భాగస్వామ్యాన్ని పెంచడం ప్రభుత్వ ప్రధాన లక్ష్యాల్లో ఒకటిగా కనిపిస్తోంది. ప్రతి కుమార్తె ఆత్మవిశ్వాసంతో క్రీడా మైదానంలోకి అడుగుపెట్టాలని, క్రీడలను ఒక బలమైన కెరీర్ అవకాశంగా చూడాలని ప్రభుత్వం కోరుకుంటోంది. పీవీ సింధు వంటి ప్రపంచస్థాయి క్రీడాకారిణి స్ఫూర్తి, ప్రభుత్వ సహకారం, అత్యుత్తమ శిక్షణ వాతావరణం ఒకేచోట అందుబాటులోకి వస్తే బాలికల క్రీడా ప్రయాణంలో గొప్ప మార్పు ఏర్పడుతుంది. కుటుంబాల్లోనూ క్రీడల పట్ల సానుకూల దృక్పథం పెరుగుతుంది. ప్రతిభ ఉన్న బాలికలకు అవకాశాల ద్వారాలు మరింత విస్తృతంగా తెరుచుకుంటాయి. సింధు ఒక్క క్రీడాకారిణిగా మాత్రమే కాకుండా అనేక తరాలకు మార్గదర్శకురాలిగా నిలవాలని, మహిళలు క్రీడలను కెరీర్‌గా ఎంచుకునేలా ఒక సానుకూల వ్యవస్థను నిర్మించడంలో భాగస్వామ్యం కావాలని లోకేష్ కోరారు.

తల్లిదండ్రులు, కోచ్‌లకు సముచిత గౌరవం

ప్రతి పతకంపై క్రీడాకారుడి పేరు మాత్రమే కనిపిస్తుంది. కానీ ఆ పతకం వెనుక ఒక కుటుంబం చేసిన త్యాగం, ఒక కోచ్ చూపిన అంకితభావం ఉంటాయి. విజేత ప్రపంచానికి కనిపించకముందే, ఆ చిన్నారిలోని విజేతను గుర్తించేది తల్లిదండ్రులే. పీవీ సింధు విజయ ప్రయాణంలో ఆమె తల్లిదండ్రులు పీవీ రమణ, విజయ అందించిన ప్రోత్సాహాన్ని లోకేష్ ప్రత్యేకంగా కొనియాడారు. సింధు ఒలింపిక్ చాంపియన్‌గా ఎదగడం వెనుక కుటుంబ సభ్యుల పట్టుదల, కోచ్‌ల సహకారం కీలకమని పేర్కొన్నారు. విశాఖలో ఏర్పడబోయే అకాడమీ క్రీడాకారులతోపాటు తల్లిదండ్రులు, కోచ్‌లు, క్రీడా నిపుణులు కలిసి పనిచేసే సమగ్ర వేదికగా మారనుంది. ప్రతిభను గుర్తించడం నుంచి ప్రపంచస్థాయి పోటీలకు సిద్ధం చేయడం వరకు ఒక సంపూర్ణ క్రీడా వ్యవస్థ ఇక్కడ రూపుదిద్దుకోబోతోంది.

విశాఖకు మరో అంతర్జాతీయ గుర్తింపు

విశాఖపట్నం ఆంధ్రప్రదేశ్ ఆర్థిక రాజధానిగా వేగంగా ఎదుగుతోంది. పరిశ్రమలు, ఐటీ, పర్యాటకం, విద్యా రంగాలతోపాటు ఇప్పుడు క్రీడా రంగంలోనూ విశాఖ తనదైన ముద్ర వేయబోతోంది. రాబోయే దశాబ్దంలో దేశ వృద్ధికి నాయకత్వం వహించే నగరాల్లో విశాఖ ముందుంటుందని, పీవీ సింధు అకాడమీ రాష్ట్ర క్రీడా వ్యవస్థలో నగరాన్ని అగ్రస్థానంలో నిలబెడుతుందని లోకేష్ విశ్వాసం వ్యక్తం చేశారు. అంతర్జాతీయ ప్రమాణాలతో కూడిన శిక్షణ, అత్యాధునిక సదుపాయాలు, సైంటిఫిక్ కోచింగ్, విభిన్న క్రీడలకు ఒకే ప్రాంగణంలో అవకాశాలు అందుబాటులోకి వస్తే విశాఖ దేశ క్రీడా పటంలో ప్రముఖ కేంద్రంగా నిలవడం ఖాయం. దేశంలోని వివిధ రాష్ట్రాల నుంచి క్రీడాకారులు ఇక్కడికి వచ్చి శిక్షణ పొందే రోజు ఎంతో దూరంలో లేదు.

ఆశతో అడుగుపెట్టి.. త్రివర్ణ పతాకంతో తిరిగొచ్చేలా

ఒక చిన్నారి చేతిలో ఆశ తప్ప మరేమీ లేకుండా ఈ అకాడమీ ద్వారం గుండా అడుగుపెట్టవచ్చు. కొన్ని సంవత్సరాల తర్వాత అదే చిన్నారి ఒలింపిక్ స్టేడియంలో త్రివర్ణ పతాకాన్ని చేతబట్టి నడవవచ్చు. ప్రపంచం పతకాన్ని చూస్తుంది. దేశం విజయాన్ని వేడుకగా జరుపుకుంటుంది. కానీ ఆ ప్రయాణం విశాఖలోని ఈ క్రీడా ప్రాంగణంలోనే ప్రారంభమైందని ఏపీ గర్వంగా గుర్తుచేసుకుంటుంది.

ఒక కుటుంబం నమ్మకం, ఒక కోచ్ మార్గదర్శకత్వం, ఒక క్రీడాకారుడి పట్టుదల, అవకాశాలను సృష్టించిన ప్రభుత్వం – ఈ నాలుగు శక్తులు కలిసినప్పుడు ప్రపంచ విజేతలు తయారవుతారు. ఒక చాంపియన్ సృష్టించే గొప్ప వారసత్వం మెడలో ధరించిన పతకం మాత్రమే కాదు. ప్రతి చిన్నారి హృదయంలో రగిలించే కలే అసలైన వారసత్వం. పీవీ సింధు సెంటర్ ఫర్ స్పోర్ట్స్ ఎక్సలెన్స్ అలాంటి లక్షలాది కలలకు వేదికగా మారబోతోంది. ఈ రోజు విశాఖలో పడిన పునాది కేవలం ఒక స్పోర్ట్స్ అకాడమీకి సంబంధించినది కాదు. రేపటి భారత చాంపియన్లకు, ఏపీ యువత ఆత్మవిశ్వాసానికి, ప్రపంచ క్రీడా వేదికపై రాష్ట్ర కీర్తిపతాకం రెపరెపలాడే భవిష్యత్తుకు వేసిన బలమైన పునాది.