గగన్‌యాన్ మిషన్‌లో ఇస్రో కీలక అడుగు: పారాచూట్, ఇంజిన్ టెస్టులు సక్సెస్ ISRO’s Big Leap in Gaganyaan: Parachute & Engine Tests a Success

July 9, 2026, 9:29 AM IST CNR

అంతరిక్ష యాత్రలో కీలక అడుగు

భారత అంతరిక్ష పరిశోధనా సంస్థ ఇస్రో కలలో మరో అద్భుత ఘట్టం ఆవిష్కృతమైంది. మనుషులను రోదసిలోకి పంపాలనే గగన్‌యాన్ మిషన్ ప్రయాణంలో ఎదురయ్యే అతిపెద్ద సవాలును ఇస్రో విజయవంతంగా ఛేదించింది. ఆకాశం నుంచి కిందకు దిగే సమయంలో వ్యోమగాముల ప్రాణాలకు ఎలాంటి ప్రమాదం కలగకుండా కాపాడే పారాచూట్ సిస్టమ్ టెస్ట్ అత్యంత ఉత్కంఠ మధ్య పూర్తయింది. మధ్యప్రదేశ్‌లోని షియోపూర్ వద్ద ఇండియన్ ఎయిర్ ఫోర్స్ విమానం నుంచి 2.5 కి.మీ ఎత్తు నుంచి డమ్మీ పేలోడ్‌ను కిందికి వదిలినప్పుడు, అది సురక్షితంగా భూమిని చేరుకున్న తీరు అందరినీ ఆకట్టుకుంది. ఈ ప్రయోగం రాబోయే రోజుల్లో ఇస్రో సృష్టించబోయే చరిత్రకు ముందస్తు సంకేతాలిస్తోందని విశ్లేషకులు చెబుతున్నారు.

పారాచూట్ వ్యవస్థతో పక్కా ప్లాన్

గగన్‌యాన్ ప్రాజెక్టులో వ్యోమగాములు సురక్షితంగా వెనక్కి తిరిగి రావడం అత్యంత క్లిష్టమైన ప్రక్రియ. అందుకే క్రూ మాడ్యూల్ వేగాన్ని తగ్గించేందుకు పది పారాచూట్లతో కూడిన ప్రత్యేక డీసిలరేషన్ సిస్టమ్ డిజైన్ చేశారు. ఇందులో 4 రకాల పారాచూట్లు దశలవారీగా తెరుచుకుంటూ మాడ్యూల్ వేగాన్ని క్రమంగా తగ్గిస్తాయి. అపెక్స్ కవర్ సెపరేషన్, డ్రోగ్ పారాచూట్లు, పైలట్ పారాచూట్లు, చివరగా ప్రధాన పారాచూట్లు ఇలా ఒకదాని తర్వాత ఒకటి ఖచ్చితమైన సమయంలో పనిచేయాలి. డీఆర్డీవో, ఇండియన్ ఆర్మీ, ఎయిర్ ఫోర్స్ భాగస్వామ్యంతో ఇస్రో నిర్వహించిన ఈ ఐదో ఐమ్యాట్ టెస్ట్ సక్సెస్ కావడం, సిస్టమ్ డిజైన్ ఎంత పక్కాగా ఉందో స్పష్టంగా అర్థమవుతోంది. భవిష్యత్తులో జరగబోయే తొలి అన్‌క్రూడ్ గగన్‌యాన్ ప్రయోగానికి ఈ విజయం ఎంతో కాన్ఫిడెన్స్ ఇస్తోంది.

ఇస్రో స్వదేశీ క్రయోజనిక్ ఇంజిన్

ఈ ప్రయోగం కేవలం పారాచూట్లకు మాత్రమే పరిమితం కాలేదు, రాకెట్ ఇంజిన్ల సామర్థ్యాన్ని కూడా ఇస్రో మరో స్థాయికి తీసుకెళ్లింది. ఎల్‌వీఎం త్రీ లాంచ్ వెహికల్‌కు శక్తినిచ్చే స్వదేశీ సీఈ 20 క్రయోజనిక్ ఇంజిన్ టెస్ట్ కూడా విజయవంతం కావడం సిస్టమ్ ఇంపాక్ట్ ను తెలియజేస్తోంది. గతంలో చంద్రయాన్ ప్రాజెక్టులతో పాటు కమర్షియల్ మిషన్లలో సత్తా చాటిన ఈ ఇంజిన్, ఇప్పుడు గగన్‌యాన్ అవసరాలకు తగ్గట్టుగా హ్యూమన్ రేటింగ్ క్వాలిఫికేషన్స్ సాధించడం మామూలు విషయం కాదు. ఇస్రో సొంతంగా అభివృద్ధి చేసిన ఈ సాంకేతికత విదేశాలపై మన ఆధారపడటాన్ని తగ్గిస్తూ, భారతీయ అంతరిక్ష రంగం సాధించిన అపారమైన ప్రగతిని ప్రపంచానికి చాటి చెబుతోంది. స్వదేశీ టెక్నాలజీతో మన వ్యోమగాములను అంతరిక్షంలోకి పంపాలన్న లక్ష్యానికి ఇది బలాన్నిస్తోంది.

నాజిల్ ప్రొటెక్షన్ సిస్టమ్ అప్‌డేట్

ఇంజిన్ సామర్థ్యాన్ని పరీక్షించే విధానంలో ఇస్రో అనుసరించిన సరికొత్త వ్యూహం విశ్లేషకుల ప్రశంసలు అందుకుంటోంది. హై ఆల్టిట్యూడ్ టెస్ట్ కండిషన్స్ లేకుండా, సముద్ర మట్టం వద్దే క్రయోజనిక్ ఇంజిన్‌ను పరీక్షించేందుకు నాజిల్ ప్రొటెక్షన్ సిస్టమ్ డెవలప్ చేయడం ఒక మాస్టర్ స్ట్రోక్ అని చెప్పాలి. మహేంద్రగిరిలోని ఇస్రో ప్రొపల్షన్ కాంప్లెక్స్ లో జరిగిన ఈ పరీక్షల ద్వారా వనరుల ఆదా జరగడమే కాకుండా, టెస్ట్ వ్యవధిని పెంచుకునే అవకాశం లభించింది. భవిష్యత్తులో LVM 3 మిషన్ కోసం ఉద్దేశించిన ఈ ఇంజిన్ పరీక్షలు విజయవంతం కావడం, ఇస్రో టెక్నికల్ ఫోకస్ ఎంత బలంగా ఉందో సూచిస్తోంది. టెక్నాలజీ పరంగా ఇస్రో సరికొత్త ట్రెండ్ సృష్టిస్తోంది.

సమిష్టి కృషితో సవాళ్ల అధిగమనం

ఈ రెండు విజయాలు భారత అంతరిక్ష యాత్రలో ముందడుగు మాత్రమే కాదు, వివిధ జాతీయ సంస్థల మధ్య ఉన్న అద్భుతమైన సమన్వయానికి నిదర్శనం. ఒకవైపు పారాచూట్ల తయారీలో డీఆర్డీవో, ప్రయోగానికి సహకరించిన ఎయిర్ ఫోర్స్, ఆర్మీ ఇలా అందరూ కలిసి పనిచేసిన తీరు చూస్తుంటే, ఒక భారీ లక్ష్యం కోసం దేశం ఎలా ఏకతాటిపైకి వస్తుందో అర్థమవుతోంది. భవిష్యత్తులో మరిన్ని సంక్లిష్టమైన ప్రయోగాలు, వాణిజ్యపరమైన ఉపగ్రహ ప్రయోగాలు, ఇతర గ్రహాల అన్వేషణకు ఈ విజయాలు బలమైన పునాది వేస్తున్నాయి. ఇది సామాన్యులలో కూడా ఎంతో ఆసక్తి రేకెత్తిస్తోంది. అంతరిక్ష మార్కెట్లో భారత వాటా మరింత పెరగడానికి, అంతర్జాతీయ వేదికపై ఇస్రో విశ్వసనీయత రెట్టింపు కావడానికి ఈ పరిణామాలు ఎంతగానో ఉపయోగపడతాయి అనడంలో సందేహం లేదు.

గగన్‌యాన్ భవిష్యత్తు ప్రయాణం

ప్రస్తుతం గగన్‌యాన్ ప్రయోగానికి సంబంధించిన కీలక దశలన్నీ దాదాపు సానుకూల ఫలితాలను ఇస్తూ, తొలి అన్‌క్రూడ్ మిషన్‌పై క్లారిటీ ఇస్తున్నాయి. అయితే మనుషులను అంతరిక్షంలోకి పంపడం అంటే ఏమాత్రం రిస్క్ తీసుకోలేని వ్యవహారం. సాంకేతిక లోపాలకు ఏమాత్రం ఆస్కారం లేకుండా ప్రతి చిన్న అంశాన్ని పదేపదే సరిచూసుకోవాల్సిన బాధ్యత ఇప్పుడు ఇస్రోపై మరింత పెరిగింది. ప్రయోగాల్లో సాధిస్తున్న విజయాలు ఉత్సాహాన్నిచ్చినా, తుది విజయం సాధించే వరకు అప్రమత్తత అవసరమని నిపుణులు హెచ్చరిస్తున్నారు. సరైన జాగ్రత్తలు, భద్రతా ప్రమాణాలతో గగన్‌యాన్ లక్ష్యాన్ని చేరుకుని, అంతరిక్ష చరిత్రలో భారత్ తనదైన సువర్ణాక్షరాల సంతకం చేసే రోజు కోసం యావత్ దేశం ఎదురుచూస్తోంది.

Yesterday, ISRO conducted the 5th Integrated Main Parahute Air-drop Test (IMAT-05) to test Gaganyaan's deceleration system! 🪂

In this test, a mass simulator fitted with Gaganyaan's decelebration (recovery) system was dropped from an IAF IL-76 aircraft from 2.5 km altitude at… pic.twitter.com/b7kgpxu1Oe
— ISRO Spaceflight (@ISROSpaceflight) July 8, 2026