యాప్ అక్కర్లేదు.. జస్ట్ స్కాన్ చేయండి: ఏపీలో వంద ప్రాంతాలకు ఏఐ స్మార్ట్ గైడ్

ఆంధ్రప్రదేశ్ పర్యాటక రంగంలో సరికొత్త శకం మొదలుకాబోతోంది. చరిత్ర, సంస్కృతి, ఆధ్యాత్మికత మేళవించిన పర్యాటక ప్రాంతాలు ఇప్పుడు టెక్నాలజీతో సరికొత్తగా ముస్తాబు అవుతున్నాయి. గుడికి వెళ్లినా, చారిత్రక కట్టడాల వద్దకు వెళ్లినా.. అక్కడ వాటి విశేషాలను మనకు వివరించే గైడ్ ఉంటే ఎంత బాగుంటుంది? కానీ ప్రతిచోటా గైడ్లు అందుబాటులో ఉండకపోవచ్చు. ఇలాంటి లోటును భర్తీ చేస్తూ ఒక స్మార్ట్ గైడ్ మీ స్మార్ట్ ఫోన్ లోనే ఉంటే? అది కూడా మనకు నచ్చిన భాషలో, మనకు నచ్చిన శైలిలో సమాధానాలు చెబుతుంటే? సరిగ్గా ఈ ఆలోచనే ఇప్పుడు ఏపీ ప్రభుత్వ నిర్ణయానికి ప్రాతిపదికగా మారింది. రాష్ట్రంలోని పర్యాటక ప్రదేశాలను గ్లోబల్ ట్రెండ్ కు అనుగుణంగా మార్చేందుకు ఆర్టిఫిషియల్ ఇంటెలిజెన్స్ ను రంగంలోకి దింపుతున్నారు.

ఏఐ టెక్నాలజీతో పర్యాటక ముఖచిత్రం మార్పు

ఎక్స్ ప్లర్జర్ అనే ప్రముఖ ట్రావెల్ టెక్ కంపెనీతో ఆంధ్రప్రదేశ్ ప్రభుత్వం మూడేళ్ల ఒప్పందం కుదుర్చుకుంది. ఈ అగ్రిమెంట్ ద్వారా నివు ఏఐ అనే బహుభాషా సంభాషణ ప్లాట్ ఫామ్ ను రాష్ట్ర వ్యాప్తంగా ఉన్న వందకు పైగా పర్యాటక కేంద్రాల్లో ప్రవేశపెట్టబోతున్నారు. ఇప్పటికే మంగళగిరిలోని శ్రీ లక్ష్మీ నరసింహ స్వామి, పానకాల స్వామి ఆలయాల్లో ఈ సిస్టమ్ ను ప్రయోగాత్మకంగా అమలు చేసి సక్సెస్ అయ్యారు. ఈ పైలట్ ప్రాజెక్టు విజయవంతం కావడంతో, ఇప్పుడు రాష్ట్రవ్యాప్తంగా అప్డేట్ చేసేందుకు ప్లాన్ సిద్ధం చేశారు. భవిష్యత్తులో ముఖ్యమైన దేవాలయాలు, బీచ్ లు, వారసత్వ కట్టడాల వద్దకు వెళ్లే పర్యాటకులు ఎలాంటి యాప్ డౌన్ లోడ్ చేయాల్సిన అవసరం లేకుండానే కేవలం క్యూఆర్ కోడ్ స్కాన్ చేసి ఈ ఉచిత సేవలను సులభంగా పొందవచ్చు.

ప్రపంచ భాషల్లో స్థానిక చరిత్ర విశ్లేషణ

సాధారణంగా వేరే రాష్ట్రాలు లేదా దేశాల నుంచి వచ్చే పర్యాటకులకు ప్రధాన సమస్య భాష. ఆ ప్రాంతపు ప్రాముఖ్యత, చరిత్రను తెలుసుకోవాలనే ఆసక్తి ఉన్నా కమ్యూనికేషన్ గ్యాప్ వల్ల అది సాధ్యపడదు. కానీ ఈ ఏఐ గైడ్ ద్వారా నూటముప్పైకి పైగా జాతీయ, అంతర్జాతీయ భాషల్లో సమాచారం లభిస్తుంది. అదీ వాయిస్ లేదా టెక్స్ట్ రూపంలో ఉండటం దీని ప్రత్యేకత. స్థానిక సంస్కృతి, మతపరమైన ప్రాముఖ్యతను కచ్చితత్వంతో అందించడం వల్ల విదేశీయులకు సైతం మన సంస్కృతి సులభంగా అర్థమవుతుంది. పర్యాటక రంగం అంటే కేవలం చూడటం మాత్రమే కాదు, అనుభూతి చెందడం. అంతా పర్యాటకమే అన్న తరహాలో రాష్ట్రంలో ప్రతి ప్రాంతం గురించి అథెంటిక్ స్టోరీస్ ను పర్యాటకులు తమ వారితో పంచుకునేలా ఈ నూతన సాంకేతికత తీవ్ర ఇంపాక్ట్ చూపే అవకాశాలు స్పష్టంగా కనిపిస్తున్నాయి.

ప్రభుత్వ విధాన నిర్ణయాలకు డేటా సపోర్ట్

ఈ టెక్నాలజీ వల్ల పర్యాటకులకు మాత్రమే కాదు, ప్రభుత్వానికి, పర్యాటక శాఖకు కూడా చాలా ప్రయోజనాలు ఉన్నాయి. ఈ ప్లాట్ ఫామ్ ద్వారా రియల్ టైమ్ డేటా ప్రభుత్వానికి చేరుతుంది. పర్యాటకులు ఏ భాషలో సమాచారం అడుగుతున్నారు? వాళ్ల ప్రశ్నలు ఏంటి? వాళ్ల ట్రావెల్ ప్యాటర్న్ ఎలా ఉంది? తదితర వివరాలన్నీ ఎప్పటికప్పుడు రికార్డ్ అవుతాయి. ఈ డేటా విశ్లేషణ ద్వారా పర్యాటక శాఖ భవిష్యత్తులో ఏ ప్రాంతంలో ఎలాంటి వసతులు కల్పించాలి, పాలసీపరంగా ఎలాంటి నిర్ణయాలు తీసుకోవాలి అనే దానిపై ఓ స్పష్టమైన క్లారిటీ వస్తుంది. ఇలా టెక్నాలజీని వాడుకుంటూ డేటా ఆధారిత నిర్ణయాలు తీసుకోవడం స్వర్ణాంధ్ర-2047 లక్ష్య సాధనలో, అలాగే ఏఐ ఆధారిత సుపరిపాలనలో ఏపీ ప్రభుత్వానికి ఒక కీలక మైలురాయిగా మారుతుందని విశ్లేషకులు అభిప్రాయపడుతున్నారు.

ఏఐ అమలులో సమతుల్యత చాలా ముఖ్యం

సాంకేతికతను వినియోగించుకోవడంలో ఏపీ అడుగులు అభినందనీయమే అయినా, కొన్ని సవాళ్లను కూడా పరిగణనలోకి తీసుకోవాలి. ఏఐ అనేది మనుషుల ఎమోషన్స్ ను పూర్తి స్థాయిలో భర్తీ చేయలేదు. ముఖ్యంగా పర్యాటక రంగంలో స్థానిక గైడ్లు తమ మాటలతో పర్యాటకులకు కలిగించే అనుభూతి వేరుగా ఉంటుంది. కాబట్టి టెక్నాలజీ రాకతో స్థానిక గైడ్ల ఉపాధికి రిస్క్ కలగకుండా, వారికి కూడా ఈ సిస్టమ్ లో భాగస్వామ్యం కల్పించేలా పాలసీ ఉంటే మరింత మేలు జరుగుతుంది. అలాగే సర్వర్ల నిర్వహణ, సైబర్ భద్రత, సున్నితమైన మతపరమైన అంశాల్లో ఏఐ కచ్చితత్వం విషయంలో చాలా జాగ్రత్తలు తీసుకోవాలి. ఏమాత్రం తప్పులొచ్చినా అది వివాదాలకు దారితీసే ప్రమాదం ఉంటుంది కాబట్టి, ఎప్పటికప్పుడు ఈ వ్యవస్థను పర్యవేక్షిస్తూ సరైన అప్డేట్స్ ఇవ్వడం చాలా కీలకమైన అంశం.

ఆధునిక పర్యాటకం వైపు వేగంగా అడుగులు

రాష్ట్ర పర్యాటక విధానం 2024-29ని బలోపేతం చేసే దిశగా తొలి ఏడాది 30 ప్రధాన ప్రాంతాల్లో, మూడేళ్లలో వందకు పైగా ప్రాంతాలకు ఈ నివు ఏఐ సేవలను విస్తరించాలన్న లక్ష్యం సానుకూల సంకేతాలిస్తోంది. అయితే ఇదంతా కేవలం ప్లాన్ కే పరిమితం కాకుండా క్షేత్రస్థాయిలో ప్రజలకు చేరువ కావాలంటే.. పర్యాటకుల రద్దీ ఎక్కువగా ఉండే సమయాల్లో డేటా స్పీడ్ తగ్గకుండా, నెట్‌వర్క్ ఒడిదుడుకులు ఉన్న ప్రాంతాల్లో కూడా ఈ సిస్టమ్ సజావుగా పనిచేసేలా క్లౌడ్ కెపాసిటీ, హైస్పీడ్ కనెక్టివిటీపై ఫోకస్ పెట్టాలి. పర్యాటకుల డేటా ప్రైవసీని కాపాడటంపై స్పష్టమైన విధానం ఉండాలి. ఏది ఏమైనా, టెక్నాలజీని పర్యాటకంతో అనుసంధానం చేయడం ద్వారా ఆంధ్రప్రదేశ్ గ్లోబల్ టూరిజం మ్యాప్ లో తనకంటూ ఒక ప్రత్యేక స్థానాన్ని నిలబెట్టుకోవడానికి సిద్ధమవుతోంది అని స్పష్టంగా అర్థమవుతోంది. ఇది ఆహ్వానించదగ్గ పరిణామమే.